Toshkent shahridagi xalqaro Vestminster universitetida barqaror rivojlanish madaniyatimizning poydevori hisoblanadi. Biz nafaqat ko’chat ekish, balki barqaror rivojlanishga qaratilgan innovatsion tashabbuslar orqali yashil makon yaratishga hissa qo’shmoqdamiz.

Universitet hududida obodonlashtirish va ekologik holatni yaxshilash maqsadida bir qator tashabbuslar amalga oshirildi:

• Ko‘chat ekish bo‘yicha tashabbuslar: "Yashil makon" milliy loyihasi doirasida havo sifatini yaxshilash va biologik xilma-xillikni saqlash uchun manzarali ko‘chatlar o‘tqazildi.

• Ichimlik suvi favvorasi: Universitet hududi bo‘ylab o‘rnatilgan bu turdagi favvoralar nafaqat toza ichimlik suvi manbai bo‘lib, balki ko‘p martalik idishlardan foydalanishni targ‘ib qilib, plastik chiqindi miqdorini kamaytirishga xizmat qiladi.

• Ekologik infratuzilma: Universitet binolari quvvat sarfini kamaytirish maqsadida tejamkor yoritish tizimlari hamda optimallashgan isitish va sovitish qurilmalari bilan jihozlangan.

• Chiqindini boshqarish dasturi: Biz maxsus ajratilgan qayta ishlash idishlari va jamoatchilik xabardorligini oshirish dasturlari orqali chiqindini qayta ishlash va bunga mas’uliyat bilan yondashishni qo‘llab-quvvatlaymiz.

• Barqaror transport yechimlari: Biz uglerod chiqindisini kamaytirish maqsadida talabalar va xodimlarni velosipedda harakatlanishga, piyoda yurish yoki jamoat transportidan foydalanishga undaymiz.

• Yashil klub va talabalar tashabbusi bilan tashkil etilgan loyihalar: Ekologiya klubi barqaror rivojlanish bo‘yicha amaliy seminarlar, hududni tozalash tadbirlari va ma’rifiy dasturlarni faol ravishda o‘tkazib kelmoqda.

• Chapter Zero Uzbekistan bilan hamkorlik: TXVU iqlimga oid harakatlarini ilgari surish va barqaror rivojlanishni samarali boshqarish uchun biznes rahbarlari, siyosatchilar va olimlarni birlashtirgan Chapter Zero Uzbekistan tashabbusi bilan hamkorlik qilmoqda. Ushbu hamkorlik iqlimga oid strategiyalar haqida xabardorlikni oshirish va ularni joriy etishga ko‘maklashmoqda.

• Quvvat tejamkorligi bo‘yicha tashabbuslar: Quvvat sarfini kamaytirish bo‘yicha chora-tadbirlar qatoriga yo‘laklarda yoritish uchun harakat sensorlarini o‘rnatish, quvvat tejovchi qurilmalardan foydalanishni targ‘ib qilish va imkon qadar qayta tiklanadigan quvvat manbalaridan foydalanish kiradi.

• Yashil maydonlar va biologik xilma-xillik: Ko‘chat ekishdan tashqari, universitetda qo‘shimcha yashil hududlar yaratish ustida ish olib bormoqda. Bu hududlarga talabalar bog‘i, changlatuvchi hasharotlarni jalb qiluvchi o‘simliklar va talabalarning salomatligini yaxshilash hamda bioxilma-xillikni saqlash maqsadida soyabonli o‘tirgichlar o‘rnatilgan joylar kiradi.

"Yashil makon" milliy dasturi doirasida Toshkentdagi xalqaro Vestminster universiteti o‘z hududida daraxtlar sonini ko‘paytirish loyihasini yo‘lga qo‘ydi. Bu loyiha atrof-muhitning barqarorligi va ekologiyani yaxshilashga xizmat qiladi. Mazkur tashabbus universitetimiz hududining tabiiy go‘zalligini oshirishga qaratilgan bo‘lib, universitetning O‘zbekistonning ekologik barqarorlik borasidagi milliy manfaatlari tarafdori ekanini namoyon etadi. Kelgusi avlod uchun barqaror kelajak yaratish yo‘lidagi sa’y-harakatlarimiz bilan faxrlanamiz.

TXVU "Yashil makon" tashabbusi doirasida tashkil etilgan "Yashil kelajak" umummilliy marafonida ishtirok etdi. Universitetimizda tashkil etilgan ko’chat ekish tadbirida TXVU rektori Komiljon Karimov, professor Piter Bonfild, talabalar va TXVU Ekologiya klubi a’zolari faol qatnashdilar. Mazkur tadbirlar Prezidentimiz Shavkat Mirziyoyevning 2025-yilni "Atrof-muhitni muhofaza qilish va yashil iqtisodiyot yili" deb e’lon qilish tashabbusini qo‘llab-quvvatlash hamda O‘zbekistonda ekologik barqarorlikni mustahkamlashga xizmat qiladi. Bu tashabbus TXVUning barqaror kelajak yaratish yo‘lidagi intilishlarini aks ettiradi.

Barqaror rivojlanish maqsadlari (BRM) bo‘yicha kurs barqaror rivojlanish va global muammolarga qaratilgan bo‘lib, muhim ta’lim bosqichiga aylandi. Kurs o‘tgan yilning oktyabr oyida boshlanib, unga doktor Komiljon Karimov rahbarlik qildi. Talabalar qiziqarli munozaralar, interaktiv bahs-munozaralar va turli loyihalarda faol ishtirok etib, BMTning Barqaror rivojlanish maqsadlari va ularning amaliy qo‘llanilishi haqida chuqur tushunchalarga ega bo'ldilar.

Kurs davomida nufuzli mehmonlar, jumladan, BMTning O‘zbekistondagi ‘Ayollar dasturi’ rahbari doktor Seren Guven Guris, Vestminster universiteti rahbari professor Piter Bonfild, BMTning O‘zbekistondagi muvofiqlashtiruv rezidenti Sabina Maxl, Osiyo taraqqiyot bankining mamlakatlararo direktori Kanokpan Lao-Araya va BMTning O‘zbekistondagi Aholishunoslik jamg‘armasi boshlig‘i Nigina Abboszoda bilan uchrashuvlar o‘tkazildi.

Yakuniy marosimda g‘olib jamoalar e’lon qilindi, asosiy xulosalar taqdim etildi, shuningdek, rektor va prorektorga minnatdorchilik ramzida sovg'alar topshirildi. G‘olib jamoa Londondagi Vestminster universitetida bo‘lib o‘tadigan Xalqaro talabalar anjumanida ishtirok etish imkoniyatiga ega bo‘ldi.

Kurs yakunlangan bo‘lsa-da, bizning barqaror rivojlanish yo‘lidagi sa’y-harakatlarimiz davom etmoqda. Ushbu loyihaning muvaffaqiyatli yakunlanishiga hissa qo‘shgan barcha ishtirokchilar, ma’ruzachilar va tashkilotchilarga samimiy minnatdorchiligimizni izhor etamiz.

TXVU ekologiya klubi Ziyo Forum xalqaro ilm-fan va ta’limni rivojlantirish jamg‘armasi tomonidan tashkil etilgan "Universitetlarda ekologik tashabbuslarni amalga oshirish: muvaffaqiyatli tajriba va istiqbollar" mavzusidagi konferensiyada ishtirok etdi. Ushbu muhim tadbir professor-o‘qituvchilar, ma’muriyat vakillari, barqaror rivojlanish sohasidagi mutaxassislar va talabalarni bir joyga to‘pladi. Ular tajriba almashish, muammolarni muhokama qilish va oliy ta’lim muassasalarida ekologik amaliyotlarni targ‘ib qilish uchun yangi imkoniyatlarni izlash maqsadida yig‘ilish o’tkazdilar.

Klub rahbari Nigina Qo‘shayeva Ekologiya klubi universitet hududida barqaror rivojlanishni ilgari surishda muhim rol o‘ynashi haqida ma’ruza qildi.

Chapter Zero Uzbekistan - Markaziy Osiyoda Iqlim o‘zgarishini boshqarish doirasida, Jahon iqtisodiy forumi (JIF) hamkorligida hamda Yevropa tiklanish va taraqqiyot banki (YTTB) va Deloitte O‘zbekiston ko‘magida tashkil etilgan ilk strategik bo‘lim hisoblanadi. Biz TXVU korporativ kengashlar orasida samarali iqlim boshqaruvini targ‘ib qilishga qaratilgan Chapter Zero Uzbekistan tashabbusi uchun platforma vazifasini bajarishini mamnuniyat bilan ma’lum qilamiz. Bu esa Chapter Zero Uzbekistan-ni global tarmoqdagi 26-bo‘limga aylantiradi.

Suvni yetarli miqdorda iste’mol qilish nafaqat sog‘lig‘imiz uchun, balki atrof-muhit uchun ham muhim. Universitet hududi bo‘ylab o‘rnatilgan yangi suv favvoralari toza ichimlik suvi manbai bo‘lib va ko‘p marta ishlatiladigan suv idishlaridan foydalanishni targ‘ib qiladi, bu esa bir martalik plastik chiqindi miqdorini kamaytirishga ko‘maklashadi. Sizning sa’y harakatingiz universitetimizni ‘Yashil Makon’ga aylantirishda yordam beradi!

2025-yil ‘Atrof-muhitni muhofaza qilish va yashil iqtisodiyot yili’ deb e’lon qilingani bois, hozir ekologik toza odatlarni hayotimizga joriy etish va barqaror kelajak qurish uchun eng qulay payt.

Barcha talaba, xodim va jamoat a’zolarini barqaror rivojlanish loyihalarimizda faol ishtirok etishga chorlaymiz! Birgalikda biz yanada yashil va barqaror kelajak yaratishga sezilarli hissa qo‘shishimiz mumkin.

Keling, kelgusi avlod uchun musaffo kelajak yaratish uchun hamjihatlikda harakat qilaylik!