2026-yil 24-fevral kuni O‘zbekiston Respublikasi Prezidenti Shavkat Mirziyoyev tomonidan yoshlar bilan o‘tkazilgan ochiq muloqot mamlakatimiz yoshlar siyosatini yanada takomillashtirishda muhim strategik bosqich sifatida baholanishi mumkin. Mazkur muloqot davlat va yoshlar o‘rtasidagi institutsional aloqalarni mustahkamlash, mavjud muammolarni bevosita muhokama qilish hamda istiqboldagi ustuvor vazifalarni aniq belgilab olish nuqtai nazaridan alohida ahamiyat kasb etdi.
Uchrashuv davomida ta’lim sifati, yoshlar bandligi, tadbirkorlikni rivojlantirish, innovatsion loyihalarni qo‘llab-quvvatlash, xorijiy tillarni o‘rganish hamda zamonaviy kasb-hunarlarni egallash masalalari keng muhokama qilindi. Ushbu yo‘nalishlar bugungi kunda mamlakat iqtisodiyotini modernizatsiya qilish va inson kapitalini rivojlantirishning asosiy harakatlantiruvchi omillar sifatida namoyon bo‘lmoqda.
Davlatimiz rahbari tomonidan yoshlar mamlakat taraqqiyotining eng muhim harakatlantiruvchi kuchi ekani alohida ta’kidlandi. Bu yondashuv yoshlarni faqat ijtimoiy qatlam sifatida emas, balki strategik resurs va islohotlarning faol ishtirokchisi sifatida ko‘rishni anglatadi.
Uchrashuvda alohida e’tibor yoshlar tadbirkorligini moliyaviy qo‘llab-quvvatlashga qaratildi. Xususan, yosh tadbirkorlar uchun imtiyozli kreditlash tizimini kengaytirish, grant va investitsiya mexanizmlarini joriy etish, shuningdek hududlarda yoshlar biznes-inkubatorlari tarmog‘ini tashkil etish bo‘yicha muhim vazifalar belgilandi. Jumladan, oliy ta’lim muassasalarining kamida 5 nafar bitiruvchisini ishga qabul qilgan tadbirkorlarga 10 mlrd so‘mgacha moliyaviy qo‘llab-quvvatlash berilishi qayd etildi. Bu kabi choralar yoshlarning iqtisodiy faolligini oshirish, yangi ish o‘rinlari yaratish va innovatsion muhitni rivojlantirishda muhim ahamiyat kasb etadi.
Ma’lumki, ta’lim tizimi, mehnat bozori va iqtisodiyot o‘rtasidagi mustahkam bog‘liqlikni ta’minlash yoshlar bandligini barqaror hal etishning eng muhim omillaridan biri hisoblanadi. Shu bois ta’lim dasturlarini iqtisodiyot ehtiyojlariga moslashtirish, amaliyotga yo‘naltirilgan ta’lim ulushini oshirish hamda raqamli ko‘nikmalarni rivojlantirish ustuvor vazifalardan bo‘lib qolmoqda.
Mazkur ustuvor yo‘nalishlardan kelib chiqib, Toshkent shahridagi Xalqaro Vestminster universitetida yoshlar bandligini ta’minlash, ularning kasbiy raqobatbardoshligini oshirish va zamonaviy mehnat bozoriga samarali integratsiyasini ta’minlash bo‘yicha tizimli va bosqichma-bosqich ishlar amalga oshirilmoqda. Universitet faoliyatining ustuvor yo‘vazifalaridan biri, bu ta’lim jarayonini real iqtisodiyot ehtiyojlariga moslashtirish va bitiruvchilarning kasbiy tayyorgarligini kuchaytirishdan iborat.
Shu maqsadda, universitetda ta’limning amaliyotga yo‘naltirilgan modeli izchil takomillashtirilmoqda. Xususan, Karyera markazi orqali ish beruvchilar bilan hamkorlikning ko‘p bosqichli mexanizmlari yo‘lga qo‘yilgan bo‘lib, ular nafaqat bitiruvchilarni ish bilan ta’minlashga, balki o‘qish jarayonidayoq talabalarni mehnat bozori bilan tanishtirishda xizmat qiladi. Markaz muntazam ravishda amaliyot, karyera yarmarkalari, kasbiy ko‘nikmalarni rivojlantirish bo‘yicha treninglar va individual kasbga yo‘naltirish xizmatlarini tashkil etadi. Mazkur kompleks yondashuv natijasida bitiruvchilarimizning qariyb 95 foizi o‘qishni tamomlaganidan so‘ng 6 oy ichida ish bilan ta’minlanadi.
Shuningdek, universitetimizda innovatsion muhitni rivojlantirish strategik ustuvor yo‘nalish sifatida qaraladi. Yaqin kelajakda startap tashabbuslarini qo‘llab-quvvatlash faoliyatini institutsional darajaga olib chiqish, universitetda innovatsiya va tadbirkorlik infratuzilmasini kengaytirish hamda xususiy sektor bilan hamkorlik asosida dastlabki moliyaviy qo‘llab-quvvatlash mexanizmlarini rivojlantirish ko‘zda tutilgan. Natijada talabalar va yosh tadqiqotchilarning o‘z g‘oyalarini amaliy loyihalarga aylantirish imkoniyatlari sezilarli darajada kengayadi.
Yoshlarni tadbirkorlik faoliyatiga keng jalb etish masalasi ham universitet strategiyasining muhim tarkibiy qismi hisoblanadi. Bugungi kunda O‘zbekiston iqtisodiyotida biznes va tadbirkorlikning roli tobora ortib borayotgani inobatga olinib, talabalarda innovatsion fikrlash, strategik boshqaruv, moliyaviy savodxonlik va real biznes muammolarini hal etish kompetensiyalarini shakllantirishga alohida e’tibor qaratilmoqda. Shu nuqtai nazardan, Universitet tarkibidagi eng yirik akademik yo‘nalish Biznes maktabi ekanligi ushbu yo‘nalishga bo‘lgan talabning yuqoriligini tasdiqlaydi.
Iqtidorli yoshlar bilan individual ishlash tizimini takomillashtirishga alohida e’tibor qaratilmoqda. Talabalarning iqtidorini erta aniqlash mexanizmlarini rivojlantirish, yuqori natijalarga erishgan talabalar uchun maxsus yetakchilik va maslahatchilik dasturlarini kengaytirish, shuningdek, talabalarni dastlabki bosqichdanoq ilmiy-tadqiqot faoliyatiga faol jalb qilish bo‘yicha kompleks chora-tadbirlar nazarda tutilgan.
Prezidentimizning yoshlar bilan uchrashuvi mamlakatimizda yoshlar siyosatining strategik ustuvor yo‘nalishlarini yanada aniq belgilab berdi. Ushbu muloqot yoshlar bilan ishlashda yangi bosqich – tizimli, natijaga yo‘naltirilgan va hamkorlikka asoslangan yondashuvni talab etayotganini ko‘rsatdi. Toshkent shahridagi Xalqaro Vestminster universiteti mazkur ustuvor vazifalarni amalga oshirishda faol ishtirok etishi, ta’lim sifati, innovatsiya va xalqaro standartlar asosida inson kapitalini rivojlantirish orqali mamlakat taraqqiyotiga munosib hissa qo‘shishi lozim.
Yoshlar salohiyatiga yo‘naltirilgan har bir tashabbus – bu O‘zbekistonning barqaror, raqobatbardosh va innovatsion kelajagiga qo‘yilgan mustahkam poydevordir.
